hape di kelas

Pa, Wahyu ngaguruan di
salahsahiji sakola anu
kawilang elite, murid muridna
ampir kabeh ka sakolana
marawa hp, atuh puguh we
samemeh diajar sora hape
meni recet disarada. Jam
pelajaran kahiji, pa' Wahyu
kabagean ngajar dikelas anu
murid muridna rada barengal,
ti rohangan guru gandeang pa'
Wahyu nuju karohangan
kelas,ningali ringkang
ringkang guru datang, murid
murid dijero kelas ngadadak
jempe kawas gaang katincak.
" Selamat pagi anak anak !"
ceuk pa' Wahyu basa lol ti
lawang panto.
" Pagiiiiii....paaaaaak !" jawab
murid meni reang.
" Samemeh neruskeun
palajaran bapa nek mere
wejangan heula ka haridep,
sakumaha anu geus kauninga
sakumna umat Islam ayeuna
keur ngajalankeun ibadah
puasa, puasa teh salahsahijina
ngalatih kadisiplinan, jadi
timimiti poe ieu masalah
kadisiplinan kudu
ditingkatkeun, utamana lamun
keur dijero kelas,ulah ngobrol
lamun bapa keur nerangkeun
kitu deui anu marawa hape
kudu di-off-keun heula, sabab
bisa ngaganggu katenangan
diajar, saha wae anu
ngalanggar paraturan ieu
bakal dibere sangsi,
ngartoooss ?!" ceuk pa' Wahyu
bari nyiapkeun bahan
palajaran
"Sangsina naon pa ?" tanya
Oneng sorana halimpu,
ma'lum bentangna kelas eta.
"Lamun kanyahoan ngobrol
waktuna diajar atawa kadenge
aya sora hape, wayahna kudu
kaluar tikelas, tah paraturan
ieu berlaku jang saha wae, teu
pilih kasih !" tembal pa'
Wahyu Can acan garing biwir
pa' Wahyu ngomong kitu, di
bangku tukang aya hape
ngirining, kabeh marelong ka
Usep, sabab sidik pisan sora
teh datangna timanehna.
"Punten pa....ieu aya sms ti
pun biang, naroskeun, saurna
kanggo buka engke hoyong
sareng kolek naon !" Usep
sasadu.
"Alesan wae...kaluar maneh
Usep !" ceuk pa' Wahyu
curukna bentik nunjuk kaluar.
"Tah...tah...hape saha deui nu
disada ?" pa' Wahyu curinghak
"Nu abdi pa...ieu rerencangan
ngajak buka bersama !" Oded
buru buru ngaku
"Oded...tuturkeun tuh si
Usep !" kiyingking si Oded
kaluar Ningali geus dua urang
nu keuna sangsi,murid sejenna
anu bogaeun hape buru buru
nga-off-keun hapena, tapi teu
kungsi lila pa' Wahyu
curinghak deui lantaran
kadenge deui aya nu disada.
"Aduuunnnn....kaluar !" ceuk
pa' Wahyu bari nunjuk ka si
Adun
"Punten pa...abdi mah teu
gaduh hape...upami teu
percanten mangga we
parios !" beungeut si Adun
ngadadak beureum.
"Nya naon atuh anu tadi
disada ?" tanya pa' Wahyu
semu heran
"Eu..anu pa..kamari teh
waktos buka puasa nuang
kolek hui cilembu seueur
teuing,janten dugi kaayeuna
ngulibek wae !" tembal si
Adun bari nepakan
beuteungna.
"Aneh...maenya sora hitut
kawas ringtone lagu "asereje"
aneh !" pa' Wahyu ngan ukur
bisa gogodeg.
"Huuuuuuhhhhh!" kaayaan
kelas ribut deui
"Geus..geus...jempeeee !"
ceuk pa' Wahyu bari ngagedor
meja, jep kaayaan dikelas
simpe, tapi teu kungsi lila
geus der deui kadenge aya
hape nu disada.
Kabeh murid culang cileung,
terus silih pelong jeung pada
baturna,panon pa' Wahyu
mureleng,sirahna dengdek
ngadedengekeun sora hape
timana jebulna, tapi lila lila
paroman pa' Wahyu robah
bari pok ngomong ka murid
muridna kawas nu era.
"Hehehe...geuning nu disada
teh hape bapa, mun kitu
mah...anak anak belajar
sendiri yah !" bari kulumas
kelemes, leos kaluar.
"Horrrseeeeehhh!....asik
euy !" kelas ricuh, sora hape
patembalan deui.